قال بيقولوا الفن رسالة
************
بالذمة ياناس شايفين
افعال الولاد مجانين
قالوا الفن رسالة
قلنا ياناس عارفين
فقاموا بكل شطارة
قلبوا الفن دعارة
وقالوبكل جسارة
اصل الفن حضارة
واحنا ياناس حضاريين
ولازم نكون فاهمين
ان احنا سبنا امبارح
ان احنا جيل بيسامح
يضحى بكل ملامح_عرضه_
علشان يمتع الملايين
بالذمة ياناس شايفين
افعال الولاد مجانين
قالوا الغرب لينا اية
ولازم يكون فينا نهاية
لتخلف دام جوانا سنين
وكتبوا فى كل حكاية
وفصل من كل رواية
مشهد فيه رقصاية
وشلة بنات حلويين
وعلشان تكمل الرسالة
لازم يكون فيه مشهد
يشهد على البنى ادميين
مشهد كله اثارة
اثارة تعمل غارة
علشان ترضى الغربيين
وتفوز بجايزة ثمينة
وكمان تفوز بالملايين
بالذمة ياناس شايفين
افعال الولاد مجانين
************

تاج الثورة مش هيلبسه غير فلان

ومش كل اللى هتفوا فى الميدان جدعان

فيهم عميل وخاين وجبان

والبلطجى والحرامى

واللى فاتح محل لبيع حقوق الانسان

واللى باع ضميره لليهود والامريكان

نقول كمان

يمكن نعرف فلان

مجموعة شباب

ايامهم كانت هباب

يحكمهم شوية كلاب

قانون الغاب

اللى يقدر يسيطر

واللى ما يقدرش

يصير تراب

معايا يا عم دياب

ولا نقول كمان

يمكن تعرف فلان

مش لازم يكون من الميدان

او قال بيان

يمكن يكون كفيف او شريف

او كان مدان ومسجون فى اراميدان

او خارج الحدود

او غايب عن الوجود

او لسه مولود

او مبتلى بالجنان

عرفتم فلان

ولا اقول كمان

مش لابس بدله مدنى او ميرى

ولا جلابيه وطاقيه وصديرى

يمكن يكون كاب وتى شيرت وشراب

او عفريته ووشه مليان هباب

اكيد عرفتم فلان

لانى مش هقول كمان

وكل واحد فينا معاه تاج

يلابسه قوام لفلان

تمن ضميرك رغيف

للضرورة احكام

هو من العدل ناس تنام فى الطل

وناس على ريش النعام بتنام

وناس بتحلم بقعدت ضل

وناس ابنها على البسين عوام

وناس بالمعلقة شاربه المر

وناس بالمعلقة شاربه شربة نعام

وناس من فقرها بتبيع العيال

وناس من كتر مالها

بتشوى بيه الحمام

للضرورة احكام

تبيع ضميرك بكام

ابيع بهدمه تسترنى

من العار والبرد والذكام

ابيع بكام رغيف

الجوع شبح مخيف

والشبع عندكم يسوى كام

ابيع ضميرى ...........

ياااااااااااااااه

انا كنت فاكره لساه رخيص

كت خايف ليموت فطيس

طلع له تمن

والتمن هو الرغيف

شىء سخيف

ان يكون تمن ضميرك رغيف

للضرورة احكام

شعب مدبوح حسب الشريعة الاسلامية

مفيش حد صالح

كله بتاع مصالح

واللى تفتكره سكر

يطلع طعمه مالح

طيب يا فالح

تعالى نحسبها من غير فضايح

انت خايف من الفضايح

دى الريحه نتنه

ومن خبيتنا

عبيناها فى صفايح

عملنا وليمة

ودبحنا الدبايح

ودعينا اللى جاى واللى رايح

دم الدبيحه سايح

عمال بيعزف

قصايد للى خايف

يحرق شفايف

قالت قبايح

دم الدبيحه نايح

لعنه تصيب كل طالح

دم الدبيحه طارح

اشباح عيونها زايغة

تفتش عن كل قاتل

تبشر كل مقتول

حبل المشنقة مفتول

مغزول جماجم

يطارد المعزول

يهاجم اللى نايم

دم الدبيحه غول

مش هيسلم منه اى ظالم

والله زمان يا ثورة

والله زمان ياثورة

ورجعت المليونيات من تانى

وميدان التحرير صبح عنوانى

لملمت افكارى ورتبت المعانى

صالحت جوايا احساس  بيعانى

ومن كفه الرقيق

صاحبته صديق

واللى كنا نقابله فى الطريق

كنا نبادله التهانى

.........................

والله زمان ياثورة

ولاد الحرام خلوكى عورة

اللى يكشفها يبقى كافر

عمره ما اتربى وفكره سافر

ويبقى من ذوات الحوافر

واللى يداريها يبقى مؤمن

ومن عقاب ربه يأمن

وان مات فى الجنة يسكن

...........................

والله زمان ياثورة

زرعت النهاردة

مليون وردة فى التحرير

النهاردة

الدنيا فاردة

كل جناحتها

للعايز يركب

للعايز يطير

النهاردة

نسمة شاردة

طلت علينا

بتشبك ايدينا

النهاردة ابدتينا

خطوة جامدة فى تحديد المصير

..........................

والله زمان ياثورة

حيتى فينا اللى مات

واللى اصبح ذكريات

والله زمان ياثورة

واللى جاى احلى من اللى فات

مولود فى يناير 2011

مولود فى يناير 2011
يوم التلات الساعة 12
وعدى من الشهور 12
ولسه مش عارف امشى او حتى احبى
وانا اللى فى سنى بيعد من 1 ل 12
كانى مولود
علشان سنى ما يعديش من الشهور 12
وتاريخ وفاتى يبقى يناير الفين و 12
  ..........................
عمرى سنة
وانا ....
لسه واقف محلك سر
والسر فى بير
والبير عليه عسكرى
والعسكرى موقف الناس طوابير
عامل لهم مقام
حرسه باحكام
واللى هينام
قوام هيلبسه الطراطير
اصل الناس عندهم صراصير
بالبياده يهرسهم
والاسم حارسهم
واللى يفقسهم
يبقى بلطجى وحقير
  .................
بتعملولى ذكرى ليه
انا لسه حيه
ومش هقع فى الخيه
دى مسرحيه
ياللى انت عايز تحتفل بيه
انت عايز تدفنى حيه
والحى ابقى من الميت
وموتى يخليك سى السيد
بس انا مش هموت
انا مخلوقه للخلود
انا مخلوقه علشان اسود
انا نبض كل الحشود
انا روح كل مؤود
انا بكره لك مولود
انا الوجود
صنع الموجود
والجميع عليا شهود

الاخوان والامريكان ايد واحدة

الاخوان ...
هما ليه نسيوا اللى كان
مش التاريخ هو التاريخ
والارض هى الارض
والزمان شبه الزمان
طب ليه ما اتعلموش
ونسيوا الدرس وما فهموش
ان حكم قراقوش .. مش هيتغير
وان مالوش عهد ولا امان 
    ..................
الخطأ ... لو نطأ
هيقول :
بتكررونى ليه
حررونى
من عقول .. من اكل الفول مصدية
هو دم الشهيد مالوش دية
ولا الثورة كانت هوجة ومعدية
يا اصحاب المصالح
يا من كنت صالح
ليه بقيت طالح
وطافح اللى جواك
والريحه نتنة
والمشكلة انها جواك
وليه فى الكراسى طامع
ما انت شايف وسامع
ان النفوس مكوية
ليه مع العسكرى ؟
تعمل اتفاقية
  .................
الاخوان والامريكان 
ايد واحدة
على استعمار البلد
متحدة
وهى كلمة واحدة
الاخوان .. يا اخوان
حزب وطنى جديد
فى معاناة الشعب هيزيد
وبالتاكيد
هما والعسكرى
هينزلوا على الثورة والثوار تنديد 

مغنواتى

مغنواتى ماشى الحال

وان ضاقت بيا طبال

وان اسودت قوى عتال

المهم ارجع بعشا للعيال

   ..............

مغنواتى حسب الطلب

اروح الفرح انضرب

وان انضربت اطرب

وان انطربت افقع الموال

وادينى ماشى على دا الحال

بين الفرح والفرح رحال

     ................

مغنواتى والبخت مايل

والفقر فيا عامل عمايل

اقوله دوبت يقولى هايل

بحلم بيوم يقولى غاير

بحلم ما شوفش دمى سايل

وببعت رسايل

ان انا بطلت افراح

من كتر الجراح

وهشتغل مع مراتى انشراح

ابيع برتقان وتفاح

لحد ما يجى يوم وارتاح

سعادة المشير

سعادة المشير

سعادتك امير

امير اظلام

امير انتقام

المهم امير

مش انتقام

علشان حرام

تنتقم من ملايين

غلبانين

مطحونين

شايلين الطين

من ساعة ما اتولدوا

لحد المشير

وانا هنا بشير

لانتقام جنابك

مع شلة ديابك

لصالح عصابة المساجين

نقول امين

ولا نعيد من تانى

اصل احنا موعدين

يحكمنا العسكرى

ليوم الدين

سلم السلطة يا مشير

ما تسلم السلطة يا عم

ما سك فيها ليه

ما تسلم السلطة ياعم

دى هم

فرحان بيها ليه

سلمها تسلم

وبكره تغنم

بحب الوطن واللى فيه

   .............

مش كفاية

ولا انت لك شوفه تانية

دى الاحوال بتتغير فى ثانية

والحشود ماليه الميدان

ذى عيدان الدرة فى الغيطان

وانت بكرة

يا متكرم .. يا متهان

واوعى تنسى ارميدان

فاتح دراعاته

ومستنى المزيد

لك زمايل فيه اكيد

يسعدهم ضيف جديد

    .............

سلم السلطة

وانت فى امان

سلمها واخزى الشيطان

دا اللى قبلك اكيد ندمان

واسال الليمان

   ..............

سلمها يا مشير

وطاوع التحرير

قبل ما يفوت الاوان

ويتنصب الميزان

وتتحاسب على اللى كان

فى البالون وماسبيرو

ومحمد محمود

ومجلس الوزرا

وعلى الشهدا

واللى جرا

واللى هيجرا

واللى اتقرا

واللى هينقرا

من الدفاتر والسجلات

ولا انت فاكر

اللى فات مات

دى مش تهيؤات

او تخمينات

هى مصير الفراعين

المصممين على قهر الحريات

الصعاليك

قلاقوونة

قلادوونة

دول ولاد مجنونة

دول ابلسه

وبمية العفاريت معجونة

ما تسيبونا

ليه بتسرقونا

شياطين خضر

ذى الشوك

معكوك فيهم معكوك

وان صحبتهم

تكون ذيهم صعلوك

   ..............

يا ابن الملوك...

سيبك من الصعلوك

هيدنسوك

ويلعنوا ساس امك وابوك

ويبقى جبت العيبه لاهلك

والكل يندهلك

يا خايب

يا نايب

ياعصى .. وما انتكش تايب

     ............

الصعاليك ... دايما

فى ديل معاليك

تجيبك ودوديك

وذى الفريك ما يحبش شريك

وان ركبوك

هيشيلوا ويحطوا عليك

هما كدة الصعاليك

طول ما انت معاك

فى نظرهم بيك

وتحت رجليك

وان فلاست ينفضوا من حواليك

     ..............

الصعاليك ....

ذى الديوك

مش بيحبوك

هما بيحبوا بعض

يدوروا عليك علشان يحاربوك

وان ما لقيوش

ينزلوا فى بعض عض

كوباية الشاى الصعيدى

كوباية الشاى الصعيدى

اللى بشربها مع الوله هريدى

عملة ذى التيتانوس

تشفى من جميع الامراض

مالهاش اى اعراض

لا قبل ولا بعد

وصدقنى فى كلمتين

ان شربتها هتكون متين

وعقلك هيبقى زين

وهتشوف بعنيك لاتنين

ويمكن تسمع من غير ودنين

     .....................

كوباية الشاى الصعيدى

هى الحل الامثل للغباء

هى الراحة بعد العناء

هى الشفا هى الدواء

   ...............

كوباية الشاى الصعيدى

اللى هيشربها ...

هيكون ملاك

وفى مامن من الهلاك

فاياك ان تهجرها اياك

وعليك بها صباحك ومساك

ساعات بحس انى انسان

ساعات بحس انى انسان

له عقل ولسان

وساعات بحس انى حيوان

له بردعة ولجام

وساعات كتير

بحس انى مقهور

وقوتى اتسرقت

وضاع منى الامان والنور

وساعات ادور على نفسى

ملقهاش

ارجع لعقلى

يقول طناش

مبدهاش

هو انت هتعيش قد اللى عاش

هما يومين وهيعدوا

ونصيبك هتخدوا

اقول لعقلى طب والنهاية

يقول كفاية

انت هتعملها حكاية

انت معقدها زيادة

هو انت فاكر انها وقفة عليك

انت باصص تحت رجليك

وان فضلت مكانك

الدايرة هتدور عليك

نصيحة منى اسمعها

دنيتك

ان ضاقت عليك وسعها

وان فلتت منك رجعها

وان قفلت فى وشك البيبان

بكل عزمك فتحها

افلاطون والطاعون

افلاطون نجا من الطاعون

بس احنا وقعنا فيه

والفلاح الغلبان المطحون

اللى ضهره شبه سواقيه

ومراته اللى شايله الصحون

اللى فيها الغدا

مش دوده فيه

والعيال اللى شايله الطاحون

والعرق مالى الجسم ساقيه

كلهم جالهم الطاعون

كلهم ممنعون

كلهم قالوا : يارتنا كنا افلاطون

     .....................

حسك عينك

تقول جالنا بلهارسيا

او انفلونزا شرق اسيا

او حمى الملاريا

او الدوسنتاريا

يا اخى جتك الف خريا

عليك وعلى اللى جابوك

انت ناسى ابوك

ساعة لما مات

جتته ولعت

يومها .. ودناه الحميات

قعد يومين ومات

سلامات .. على المستشفيات

اللى ذى القبور

للحى واللى مات

سلامات

للجاى واللى فات

احنا مش عايزين المعونة

اصحوا يابشر

فوقوا من الجنان

هو من امتى الامريكان

عايزين مصلحة البلد

انتم فاكرين زمان

لما جه الاولعبان

اوباما زعيم الامريكان

وخطب فينا .. علشان يدينا الامان

قال كلام حسن

من مسجد السلطان حسن

لما سمعنا الكلام

فهمناه قوام

وقلنا عليه صديق

واهو طلع برىء

....................

ومرت الايام

وعدى علينا العام ورا العام

وانتظرنا الفارس الهمام

علشان ياخدنا للامام

بص علينا وقال ....

انتم مسلمين

وانا بخاف من الاسلام

كفاية عليكم المعونة

يا ناس اسمعونا

يا ناس افهمونا

يا ناس ارحمونا

ملعون ابو المعونة

احنا مش عايزين المعونة

يا مصر انا جيلك

يا تسمعينى .. يا ماتسمعنيش

انما تقوليلى قول .. وانت سدا ودانك ما ينفعنيش

حرام عليكى ان وردى دبل على غصونك

من غير ما تشمنيش

ومن غير ذ نب

ترمينى على الارض

بعد ما كنت ورد

تدهسنى الرجلين

وانا كان بدى اعيش

ليه كدا يا ام

دا احنا كلنا فى الهم

واحد

والرب واحد

والمصيبة اننا عارفين

ان الساكت على الحق

يبقى من الشياطين

يا ام .. انا جيلك

         انا نيلك

        بناديلك

احمينى من الفراعين

احمينى من الزنازين

احمينى من مدرعات

اغتالت حلم السنين

كانت سنابل خضر

بذور لاحلام الملايين

يا ام .. انا نبتك

        انا ابنك

انا جيل مش هيتكرر

انا جيل هيتحرر

رغم انف المستبدين

انا جيل مش هيتكرر

حتى لو بعد الف جيل

رسالة الى المجلس العسكرى ( شعر عامى )

هى قصة ولا رواية

ما تقولولنا اية الحكاية

هى ثورة ...

ولا عورة ...

ان كانت عورة

نداريها

وان كانت ثورة

نتباها بيها

مش نخبيها

صح يا عسكرى

ولا انت فى الكلام فنجرى

فعلك هولامى

مش عارفله شكل

واللى حاصل امامى

ما يدخلش عقل

البلطجى سايبه يدبح فى المخاليق

والثورجى محصره بالتلفيق

وان قولنا مطالب ثورية

تقولوا مطالب فئوية

وان سكتوا شوية

هتتحسن شوية

وتبقى العيشة هنية

بس هى هى

شوية فول على حبة طعمية

وان زهزهت شوية

يبقى علبة تونة ويا زتونة

وان حلما باكثر من كدة

يبقى احنا ولاد مجنونة

صح يا عسكرى

ولا انت فى الكلام فنجرى